عالمنا المفتوح .. داخل عالمنا المغلق
منذ فترة إعتقدت - كما أعتقد انه يعتقد كثيرا مثلى كما إعتقدت - أني سأدخل عالم المدونات لكي أنفتح على كل الناس .. اكتب واتحدث واناقش فيما اشاء وبقليل من الضوابط .. أي اني سأدخل الي عالم مفتوح
لكن وبعد نظرة في عالم التدوين الآن .. وبعد تجربة قاربت على النصف عام .. وجدتني فعلا دخلت الي عالم مفتوح .. ولكن داخل عالم اخر مغلق.. زي ما اكون طلعت من غرفتي الي الصالة .. يعني انا لسة في نفس البيت.. وجدت مجتمع مدوني الاخوان- وأنا منهم- يمارس الانفتاح فقط على نفسة .. ويناقش فقط ما يخصه .. فأصبحنا نناقش قضايانا الداخلية .. ولانعلق الا على المواضيع الاخوانية في المدونات الاخوانية .. لماذا لا أدري ؟؟
ربما لأننا وجدنا لأول مرة متنفسا .. نتكلم ونعبر فيه بطلاقة .. أو ربما وجدنا مساحة للتواصل لا يمكن أن توفرها أي وسيلة أخرى حتى الآن .. لكننا بهذا تناسينا مهمة جليلة يمكن تحقيقها بسهولة جدا من خلال مدونتنا
سأحكي لكم موقفا
في أول مقابلة مع أحد أصدقائي المدونين الغير منتمين لأي تيار أو جماعة .. قال لي .. يا أخي أنتو حاجة غريبة .. أنا بقالي فترة بأدور على الإخوان.. ولقيتهم في المدونات .. لكن برضة لقيتهم منغلقين على نفسيهم .. مبيتكلموش الا في قضاياهم وبيعلقوش الا عند بعض .. ده أنا مفيش حد بيعلق عندي .. شوف بقى .. وانا بأدور عليكم ومش أنا بس ده في زيي كتير
ساعتها رأيت الحقيقة ببساطة .. أننا نفعل على أرض الواقع ما نحاربه أصلا .. ونتحدث بما ننقضة .. ونهدم ما نسعى إليه .. ربما نشعر أو لا نشعر .. ربما نقصد أولا نقصد .. لكن أظن أن هذه هي الحقيقه .. وأني مشترك فيها ايضا لا شك
سأنقل لكم ان شاء الله في توينة لاحقة عبر حوار مع صديقي .. كيف يرانا ولماذا نحن وما هي نواقصنا وأشياء كثيرة؟؟ وهو على فكرة من أشد محبينا ومؤيدينا .... ارجوا ان تكون مفيده للجميع
Comments
موضوعك الحالي والسابق غاية في الأهميه
وخاصة فيما يتعلق بالنقطه الأخيره في الانغلاق
وأتمثلها بداية
في عدم اعلان الانتماء لأنه غير مطلوب للمدونه بشكل كبير كأن يذكر في البروفايل أو يوضع لوجو أو غيره
ايضا البعد قليلا عن مناقشة المشاكل الاخوانيه والدعويه والداخليه والتطرق الى موضوعات عامه وأفكار عامه تفيد الجميع
والبحث عن المدونات الأخرى اللي بتشتكي من تجاهلنا كما تقول
أتمنى أن تصل كلماتك للجميع
وهذا بوست كتبته من فترة عن موضوع مشابه لو تريد الاطلاع
التعديلات التدوينيه
بس مش هتكلم
عشان الإخلاص بقى
(:
عندك حق يا شاهنشي والله
بس هو يعني انت يعني لازم يعني
قصدي ااقول انك لازم تاخد بالك من نقطه في موضوع المدونات الاخري غير الاخوانيه ان الوقت يدوبك مش بيسمح باكتر من كده هو يدوبك تنزل البوست بتاعك وترد علي التعليقات وتعلق علي كام مدونه انت تعرف اصحابها كويس
والدليل علي كده انه في عشرات المدونات الاخوانيه الواجد مننا مش بيتابعها ولا بيعلق فيها يعني مش بس المدونات الغير الاخوانيه
من الاخر انا مثلا لو ليا واحد اعرفه كويس ومسيحي يا عم وعامل مدونه هتابعها وهعلق عنده
يعني المشكله بالنسبه ليا هي ضيق الوقت ولذلك بعلق عند الناس اللي اعرفهم كويس بس
وان كان ده غلط بس نعمل ايه ؟؟؟؟؟؟؟؟؟
بالنسبه للمواضيع فمش كل المدونات الاخوانيه المواضيع اللي فيها تخص الاخوان
وان كان في بعضها كده
اولا..ان التعامل مع المدونات ياتى على درجتين اولها المتابعة وثانيها التفاعل بالتعليق والنقاشات
فكثير منا كاخوان وكثير جدا فعلا بتعامل مع مدونات كثييييرة خارج نطاق الاخوان ولكن من خلال المتابعة فقط دون التفاعل معها بالتعليقات
وده احيانا كسل واحيانا احساس بعدم جدوى التعليق واحيانا قلق من اسلوب النقاش يعنى لاسباب كتير..و متابعتها حاجة كويسة والاكتفاء به احيانا بردو بيكون الحل الانسب لكن التعليق بيفتح مجالات اوسع
ثانيا..اشعر ان طبيعى عندما ندخل اصلا فى مجتمع جديد كمجتمع التدوين انه يكون هناك فترة اكتشاف ليه فالمعظم بيتجه ناحية من يجمعه به مشتركات فى البداية كى لا يشعر بانه داخل مجتمع جديد وافكار جديدة واسلوب جديد وكل حاجة جديدة..فبنتجه للاقرب لينا بس احيانا بنعتاد ونطمئن لذلك وتكون دى الصورة النهائية التى نكتفى بها
يعنى اظن ان مفيش مشكلة اذا الموضوع بيتطور مع الوقت واحنا مركزين
المشكلة بس لو الموضوع مش فى مجال تفكيرنا اصلا
والتدوينة دى دعوة لان يكون له مكان فى تفكيرنا
احنا فعلا محتاجين ننفتح على كله العالم المغلق قبل المنفتح .. يعنى محتاجين نتعرف على الاوضة قبل ما نخرج للصالة
ربنا يكرمك .. جزيت خيرا.. يارب فعلا نبدا بانفسنا وفى الاوضة قبل ما نخرج للصالة
الموضوع ده فعلا لسه جاى على دماغى النهاردة ولقيت فعلا إللى إنت بتقولوه صحيح
بس الفكرة إن إحنا مش بس إنغلقنا على نفسنا
إحنا كمان إنغلقنا على مواضيع معينة فقط هى التى نناقشها وغالبا ماتكون مواضيع خاصةلايفهمها غير الإخوان
وبالتالى لم تكون هناك مساحة على مدوناتنا مشاركة للآخرين
لكن فى بعض الأحيان وخاصة فى البداية تجد نفسك تلقائيا تندمج مع من يقاربك الفكر حيث أن الإخوان مهما إختلفوا يبقى هناك جانب مشترك وهو الجانب التربوى الذى يجمعنا
ومع ذلك عندك حق
عن نفسى سأحاول التفاعل مع الآخرين
وشكرا على البوست الرائع ده
جزاكم الله خير على تعليقك ونصائحك العملية .. وجزاكم الله خير لأنك جبتلي حقي من الجعلي .. وان شاء الله سأطالع بوست التدعديلات التدوينية .. سلاماتي ايضا .. وبالتوفيق
حضرتك قدمت نقطة فعهلا مهمة جدا .. بس أكد على كلامك .. المهم ان الموضوع يبقى في دماغنا .. بالتوفيق
أول مرة أحس أني كتبت تدوينة فيها نفصان .. كل تعليق بيخش زود بعد أخر .. حضرتك قلت ننفتح على الغرفة ونعرفها الأول كويس وبعد كمده نطلع للصالة .. نقطة مهمة جدا .. جزاكم الله خير .. بالتوفيق
شيء من اثنين إما معظم الحركة التدينية من الإخوان وهو الى حد ما قد يكون صحيحا لأنهم لديهم الحيوية و النشاط و الإسمان بجدوى ما يفعلون
أو أنهم يخشون الإختلاط مع أفكار الأخرين و التفاعل معها و لا أقول التأثر بها
ماذا تخشون يا أخوة و يا أخوات؟
هل تخشون مثلا من ضعف الحجة؟
أو ربما من العناد لدى الطرف الأخر
او ربما عدم واقعية قيمكم و ما تؤمنون به من أفكار؟
أم أنكم مجرد كسالى و تنتظرون من الناص القدوم اليكم و أخذ رأيكم
لماذا لا يكون لديكم روح لمبادرة و هي جوهر الدعوة الى الله؟
و إن غابت روح المبادرة فعلى الأقل تحلوا بروح التفاعل مع الآخرين القريبين منكم لا أقول المختلفين معكم جذريا
تذكروا أن هدفكم ليس إخوانيا ... ولكن إسلاميا بالأساس و حلمكم يجب أن يكون لكل مسلم و كل من يعيش على أرض مسلمة و حلمكم يجب أن يسعى لجعل لكل فرد مسلم دور في تنفيذ الفكرة الإسلامية ليس فقط الإخوان هم المؤتمنيين على الفكرة الإسلامية بل هم حراسها و ليسوا فقط المسئولين عنها
كلنا مسئولون عنها
أدخلونا في مناقشتكم و حوارتكم و لا تكتفوا برأي بعضكم سواء من القيادات او القواعد
هل ربما لا تثقون بنا أننا على دراية أو ربما أسوأ ... أننا لسنا على مستوى اخلاصكم للفكرة الإسلامية و الولاء لها؟
أم أن لكم خصوصية ثقافية لا تحبون أن يطلع عليها غير الإخوان
أتمنى ماقشة كل تلك الأمور بصراحة مع أنفسكم أولا و مراجعة كل تصرفاتكم و أنشطتكم و ما الغرض منها و لو أخبرتموني انها مجرد أوهام ... صدقوني سأصدقكم و أطوي تلك الصفحة تماما
هل أنتم إخوانناو نحن أخوانكم أيضا أم ماذا؟
وعذرا للإطالة
على الرغم انى مش بكتب تعليقات
لكن بجد انت نجحت .. مبروك .. نجحت فى انك تستفزنى انى اكتب تعليق
:D
هو بداية انا مقريتش كل التعليقات لكن عايز اقول حاجة
هو ايه اصلا معنى مدونة ؟؟
مش المفروض اللى بيستخدم حاجة يستخدمها فى الاستخدام الصحيح بتاعها ؟؟
مينفعش اروح اجيب موبايل علشان استخدمه هارد ديسك !!
فدى اول نقطة .. ان احنا الاول نفهم يعنى ايه مدونة اصلا .. وبعدها نبدأ نستخدمها
ثانيا : للاسف ان عالم الانترنت المفتوح واللى مفيش حد يقدر يحكمه .. فاى حد بيعمل اى حاجة ومحدش عارف حاجة
يبقى العامل الوحيد اللى هيطلعلك منتج كويس هو العامل الداخلى .. انت من جواك .. ولو انت كويس يبقى هتعمل حاجات كويسة
والعكس
فاللى انت بتشوفه ده .. ما هو الا انعكاس لما هو داخلنا وفقط
فلما تلاقى انى بكتب كلام ملهوش لازمة .. يبقى اعرف انى من جوايا كده
وهلم جرا
وربنا يستر
عندك حق بس فعلا كما قال وائل مفيش وقت
والله المستعان
ممكن تضفنى عندك صديق جديد
اما والله عالم غريبة صحيح
؛-)
بس تصدق فعلا الموضوع المطروح ده يا باشمهندس مهم جدا وواقعى جدا جدا، انا لن أبرر ولكن إلى حد كبير جدا بأتفق مع ما قاله وائل من مبررات وأشعر أننى هذا الرجل الذى تكلم عنه وائل.
ولكن من ناحية أخرى أظن أنه لاول مرة تتاح لنا نحن كأفراد داخل الجماعة فرصة النقاش والحوار وتبادل الأفكار بهذه الصورة المفتوحة والمتسعة المدى، لذا -فى ظنى- كان من الطبيعى ان تشغلنا ولو لفترة النقاشات الداخلية. وكأننا مجموعة نعمل سويا ولكننا نلتقى لاول مرة، فبالتأكيد سيغل الحديث عن العمل جزءا كبيرا من وقتنا فى البداية
على اى حال كل التحية لكم ولصديقكم ويسعدنا حواركم الذى ننتظره بفارغ الصبر
بالنسبة للنقطة التانية ان اللي جوايا بينعكس عليا .. بصراحة أنا اتفق معاك .. وبشدة .. بالتوفيق يا جنرال .. واتمنى أن اراك قريبا
مبروك يا سيدي على المدونة .. وعقبال السكو سيكو ..وجزاكم الله خير على تعليقك .. وشرفتن زيارتك
طبعا انا مش هتكلم على الفضيحة النحوية حديث المدونات .. لأني انا اللي انتصرت في الاخر بعد تمسك واضح وجلي لموقفي .. وزي ما انت قلت الايام دول... بالنسبة لتعلقيك .. فطبعا انت بتشوف ا حد بيعارضني وتتفق معاه .. على العموم يا دكتور .. رأي وائل كان معتبر بصراحة .. بس أن مبحبش استسلم لواقع غلط أو مش مظبوط ..ارجو ان اكون وضحت .. جزاكم الله خيير
بس أنا شايف أن التصور اللى إحنا متخيلينه بتاع الإنفتاح و .. و
هو اللى غلط مش تعاملنا مع المسألة ديه فى المدونات .
يعنى أصلاً الموضوع بشكل طبيعى جداً ، عند كل الناس ، أن التدوين فى حلقات مغلقة ، فحلقة المدونين من الإخوان جواها عدد كبير من الحلقات فى حد ذاتها
ولو بصيت فى أى مدونة هتلاقى تعليقاتها ومتابعات صاحبها ، برضه جوه حلقة خاصة بيه ، ده شىء طبيعى جداً
فلذلك انا شايف أنه مسألة الإنفتاح والإنغلاق لا محل لها من الإعراب خالص فى الموضوع ده