Friday, June 8, 2007

فوضى منظمة



بعد الوقوف طوييييييلا في احد اهم المفترقات الحياتية ... و الشخصية ...والنفسية

وبعد تفكير
وتمعن

واستشارات
واستخارات


أخذت القرار... والقرار ليس الفرار ... وانما المواجهة
القرار... أن اسلك طريق التدوين
فكانت فوضى منظمة

فوضى منظمة...أعبر بها عن شخصيتي أنا ..عن رأيي أنا ..عن فكري أنا




حكاية الفوضى المنظمة

أنا هقولك مثال من عند الحاج اينشتاين أثبت فيه ان الفوضى دائما منظمة


امسك مجموعة ورق بأيدك

وقف في غرفتك بزاويه خمسه واربعين ريختر
واعرف درجة الحرار
وضعط الهواء

بص ناحية اليمين ...أيييوة كده
ارمي الورق بقوة؟؟ ههه..أية اللي حصل

أكيد الورق نزل .. منعكش.. ومفركش.. ومفيش علاقه تربط مكان الورق ببعضه..زي الصورة اللي فوق كده.... يعني قمة الفوضى



بس إعمل نفس التجربة تاني حافظ على نفس ظروف التجربه الأولى ..قف نفس الوقفه بنفس ترتيب الورق ونفس درجة حرارة الجو ونفس الضغط ونفس القوة اللي رميت بيها الورق وأكيد نفس الأوضة ومتنساش تبص ناحية اليمين..أيييوه كده؟؟
تفتكر أما نرمي الورق هيحصل أيه ؟؟ أكيد الورق هينزل زي المرة الأولى بالضبط ..منعكش .. ومفركش.. زي الصورة اللي فوق كده

بس هذه المرة نستنتج حاجتين ..الحاجة الأولى أن فتكات أخت نعمات كانت مضايقة عشان جابت لجوزها تلفزيون بريموت وماجبتش لابنها فلات فوت عشان ميخشش الجيش


الحاجة التانيه أن هناك علاقة ما تربط مكان الورق ببعضه .. يعني هناك فكرة منظمه..وقانون حاكم لهذه الفوضى.. بس إحنا لازم نمعن النظر والتفكير كتييييييير.... ونذاكر شوية رياضة حلويين كده( اييمت اتينين كيلو ونص) وشوية فزياء على فلك..عشان نصل الي الفكرة الحاكمه لفوضى الورق...أو الفوضى المنظمة للورق

و انا عن نفسي مقتنع تماما بهذه النظرية العظيمة ومقتنع أن هناك لأي حاجة في الدنيا فكرة حاكمة وأن مفيش حاجه أسمها فوضى... بس بالنسبه لك وانت بتقرأ على مدونتي ... لو وجدت كلماتي تستحق القراءة والتمعن ووصلت من خلالها الي فكرة حاكمة فاعتبر افكاري فوضى منظمة .. وان لم تجدها كذلك فاعتبرافكاري مجرد فوضى

44 comments:

ومضات .. أحمد الجعلى said...

ألو

ألووووو

ألوووووووو

1

2

3

ايه ده ما فيش حد هنا ولا ايه؟؟

ايه الصحرا دى؟؟

ايه الفوضى دى؟؟

بقى دى بقى اللى اسمها فوضى منظمة!!!!

عجايب آخر زمن، فوضى ومنظمة !!! واللى يعيش ياما يشوف يا شاهنشى.
(:

ألف مبروووووووووك يا هندسة على المدونة والحمد لله إنى أول واحد دخلت وعلقت، واكيد كما يبدو من البداية إنها ستكون فوضى وأى فوضى، وإن الدنيا هتتقلب وكراسى هتترمى وربنا يستر

فى الانتظار بكل شوق ولهفة لكتاباتك وأفكارك الشاهينشية المبدعة التى خرجت توا من فرن "وادى عبقر مصفوفة ابتكارية" مش كان اسم مشروع التخرج بتاعك كده صح؟؟ ولا حاجة قريبة من كده، المشروع اللى طلع التالت على الدفعة ده

مبروك لعالم التدوين انضمام الباشمهندش شاهين خريج هندسة البترول ويارب دوما للأمام يا هندسة

رمزي said...

إيه يا عم؟
أخيرأً؟
وبعد طول انتظار

على فكرة انا زعلان جداً
كان نفسي أكتبلك أول تعليق
الماسدج لسة جايالي حالاً
قولت هلاقي ماحدش علق
بس طلعنا اتأخرنا

المهم 1000000000000000مبروك
اليومين دول كل شوية أقولك مبروك وعقبال العروسة
شد حيلك بأة
سبعاوي مش أجدع منك

عبدو بن خلدون said...

I
am
writing
on
A
PC
that
doesn't
support
Arabic

sOrRy

1
-
cOnGAtS

4
-
mAbRoUk

3
-
UR wElCoMe

8
-
I
am
waiting
4
the
so-called
organized
chaos
!

Omar Elgarhy said...

الف مبروووووووووك يا شاهينشى باشا

ايه الحلاوة والكلام الجامد ده

ربنا يكرمك يا باشا ويوفقك فى مدونتك

بس ياريت تقولنا انت ايه هدفك من التدوين وايه اتجاه المدونة بتاعتك ؟؟

كده يعنى بقه وبتاع :D

بن توفيق said...

نع العلم انك لغبطلى دماغى .. وتعبتلى .. وخلتنى افكر انى اعمل التجربة بتاعتك دى عندى فى الاوضة
وابص برضة على اليمين


لكن رعت فى كلامى .. عشان انا الللى هضطر اظبط الورق تانى .. لان امى بالتأكيد هتقولى وانا مالى


لكن الف مبروك على الفوضى اللى انت هتسببهالنا دى .. :)

عمرو طموح said...

و هكذا دواليب...

كسب عالم التدوين، و اكتسب.. و تكسب و اسنكب - بس بنظام برضه - رجلا من أهم الرجالات.. و إنسانا و لا كل الإنسانات.. و بشرا و لا كل المبشورات...

مبروك يا هلوسة:))))))

و الحاجة الجامدة جدا... الاسم و الفكرة

و الحاجة الأجمد.. البانر اللي فوق

و الحاجة الأجمد و أجمد... الصورة اللي انت حاطط نصك بس فيها.. أكيد عشان بتدور علي نصك التاني.. صح... زي مانا فهمت منك في مرة إنك ناوي في الصيف... مش كده وللا ايه؟ يللا الصيف جه.. بلاش دلع بأه.. عاوزين نحدفك لفوق و احنا بنبص ناحية اليمين و تنزل ملغبط و مفركش و منعكش.. و بعد كده نعيد التجربة في نفس الظروف. و أكيد هتنزل برضه بنفس الفعكشة و النعكشة... و هي دي الفوضي المنظمة...

بس سؤال أخير...

و سؤال بجد...

هل هي فوضي منظمة أم هي فوضي منتظمة؟

في انتظار الإجابة من عالم البحار بعيد الفاصل

وائل said...

الحقيقيه يا شاهنشي يا بني انت صعبان عليا قووووووووووووووي

وانا عرفت الوقتي وبعد كتابتك لهذا الموضوع سر تربيتك لشعرك وانك بتخليه منعكش ومفركش كده زي الورق بتاعك ده

بس كل اللي ااقدر ااقولهولك انك ياريت ماتعملش في نفسك كده محدش واخد منها حاجه يا صاحبي

حرام عليك نفسك يعني

تقعد ترمي الورق وتقيس درجة الحراره وتبص علي منظر الورق وهو منعكش
وبعدين تبعت للحاجه فتكات تلمه معاك وتلاقيها زعلانه

خدها حكمه يا شاهنشي
زي مابيقولوا كده
ايييييييييييييييييييييييييييه دنيا
الانسان فيها ضيف

الف الف مبروك يا غالي عالمدونه وعقبال
العروسه كده عشان نفرح فيك

عبدالرحمن رشوان said...

لسا داخل البيت دلوقتى ياشاهينشى
أول ما دخلت رحت أقرا المدونة

فى البداية

مش عايز أتكلم عن نصك الجميل يارب نصك التانى يكمل قريب وتتجوز وتجيبلنا عيال كتيرة
;-D

ولا عايز أتكلم على اسم المدونة عشان رائع جدا وأنا حاسس إنه فعلا معبر عن حالة أنت عايشها

ولا عايز أتكلم عن تعريفك بنفسك عشان واضح وجميل ولمست فيه شخصيتك أوى أوى

إنما اللى عايز أتكلم عليه هو عمنا اينشتاين
بالطبع تفسيره منطقى للغاية ولكنه يفترض قوة علم رهيبة لا نهائية لا منطقية

فمن المستحيل أن ترمى الورق بنفس القوة وبنفس الضغط محافظا على كل عوامل الحرارة وتحرك الهواء فى الغرفة

ولذا أخترع العلماء علم الإحتمالات لأنه يناسب الحياة بمفهومها الواقعى

المهم : 100000000000 مبروك
وبجد متتصورش أنا فرحان أد ايه

وأعتقد إن المدونة دى إن شاء الله إضافة حقيقية

إلى جانب نظرية اللى قولتلك عليها حتى يتفرق دمه بين القبائل :)

معذرة والله أنا طولت عليك
بس أعمل ايه
أصلى بحبك

أخوك
عبدالرحمن

sharkawoo said...

لالالالالالالالالالالالالالالالالالالالالالالا


شاهنشي عاملهاااا


لالالالالالالالالالالالالالالالالالالالالالا


يبدوا إن جلوسك مع الدكتور أحمد الجعلي خلال الفترة السابقة أقنعك أخيراً بالتدوين العلني ... لا بجد مبروك يا ريسنا ...


بغض النظر عن الحاج إنشتاين ... والرياضة البحتة إلي ممكن تقعد مع الواحد 4 سنوات من عمره ...الموضوع يستحق فعلاً التفكير ...

بس السؤال بجد هل في حياتنا حالياً فكرة حاكمة لنظرية الفوضي دي ...

لان للاسف أري ليس هناك أي نوع من ثوابت التحرك عند أي منظمة ...

ففي نظرية الورق الفوضي دي حكمها الواثق بزاوية معينة مع ضغط معين مع حرارة معينة ... بس هل يا تري المحركون للفوضي يعرفون الكلام دا ...

ولا زي ما تيجي مرة درجة عشرين ومرة 180

بس علي العموم فكرة تحتاج لتفكير عميق :)


تحياتي بشدة وبقسوة وبكل حاجة :D

SHAHEENSHY said...

دكتور جعجوعي..ازيك يا أسطه...أنا فرحان جدا انك أول واحد نشوف المدونة وتعلق ...ده شرف كبير جدا ليك ..قبل ما يكون ليا طبعا ..وبعدين أنت داخل ورشة خراطة..الو واحد اتنين تلاته..ولو سمحت بطل تتطلع عني اشاعات مغرضة خاصة عن مشروع التخرج بتاعي..ولما الكراسي تتحدف وتترمي متبقاش تسبني وتجري زي العادة ..ولا أقولك ابقى استخبة عشان بخاف عليك
بالتوفيق

SHAHEENSHY said...

رمزي ..حبيبي .. اكتر واحد نفسي يعمل مدونه ..لاني عارف ان جواك كتير تفبد وتستفيد بيه ..وماتزعلش يا رمزي عشان انا بضايق جدا اما اعرف انك زعلان ..وبالنسة للعروسة أنت عارف ان كل الاشخاص اللي بخدهم مثل اعلى ليا لسة متجوزوش ... عقبال مدونتك بقى

SHAHEENSHY said...

بن خلدون

من طائفة
المطرقعة عقولهم
الطيبة قلوبهم
اللي بحترمهم جدا
لي
طلب لو
سمحت
بطل
تكتب بالاسلوب ده
لان اعصابي بتتعب
ولو غيرت
ارجو انك
متكتبش /ش
من الشمال لليمين مثلا
او من تحت لفوق
اوالكلمة تبقى بالشقلوب

SHAHEENSHY said...

الجارحي
شكرا لتشريفك ليا
بالنسبة لموضوع اتجاة المدونة واهدافها..فده موضوع كبييير .. بس باختصار ..انا بتعامل مع التدوين على انه وسيلة اعلاميه بحته بتستهدف عدة شرايح ..كل شريحه لها لغة خطاب واهداف .. وبيجمع كل ده في الاخر راي الشخصي أو اسلوب كتاباتي في مواضيع شخصية أو انسانيه أو سياسية أو فكرية فلسفية تخص المجتمع عموما ..أو مجتمعنا الداخلي كمنتمين للحركة الاسلاميه ..وما اشوفك قريبا بقى نتكلم عن الموضوع ده بالتفصيل

SHAHEENSHY said...

بن توفيق
ازيك يا حبيبي ..واحشني كتير..كنت قولي انك عايز تعمل التجربة وانا يا أخي هاجي اظبط معاك الورق ..
الي لقاء قريب

SHAHEENSHY said...

عمرو طموخ ..شخصيا..بقى أنا من المبشورات يا عمرو ..بقى ده أخرتها ..ماشي ياعم الطموح
شكرا لتشريفك المدونة ..

أما الفوضى منظمة أو منتظمة فده سؤال مهم ؟؟وانا فكرت فيه وانا بختار الاسم
من رأي..في فرق كبير طبعا بين منظمة ومنتظمة..فمنتظمه تشير الي معدل حدوث ..يعني الفوضى دي بتحصل كل ساعتين وربع بشكل منتظم مثلا.. أما انا اقصد أن الفوضى أصلا فى جوهرها منظمة ولها قانون حاكم حتى لو أحنا لسه لم نمتلك العلم عشان نعرف هذا القانون..أرجوا ان اكون وضحت
وبعدين انا قولتلك قبل كده اني عاوز أجوز ؟؟انت هتلبسني تهمة
بالتوفيق

SHAHEENSHY said...

وائل
أزيك يا وائل ..انت شرفتني بتعليقك .. على الرغم انك برضه عايز تتطلع عليا اشاعات زي الجعلي..وملاكش دعوى بالحاجه فتكات لو سمحت
شد حيلك بقى ..صديقك سبعاوي عملها ..عمل مدونة وهيجوز ..طب اعمل انت حاجة منهم

SHAHEENSHY said...

عبد الرحمن رشوان
اخي الحبيب ..كيف حالك ..شكرا لدعمك وثنائك على المدونه

انت أثرت موضوع مهم جدا كنت هطرحه بالتفصيل في تدوينة لاحقه.. بص انا رأي ان احنا لازم نفرق امتى نستخدم المثاليه المطلقة والمثالية الواقعية ..في رأي ان عالم الافكار لازم نتعامل معاة بالمثاليه المطلقة وهو ان مفيش حاجه اسمها فوضى وان كل حاجه لها فكره حاكمة ومنظمة ولها مسببات ونتائج..أما اذا نزلنا الي عالم الواقع فاننا يجب ان نحور افكرنا ذات المثالية المطلقه الى شكل تطبيقي يناسب الواقع بقدر الامكان يعني مثالية واقعيه .. وان شاء الله في تدوينه لاحقة عن هذا الموضوع
سلام

يلا مش مهم said...

كان نفسياكون اول معلق عندك
بس يا خسارة كنت في معسكر مع الاخوان ومكانش في فرصة علشان ادخل علي النت اصلا
علي العموم الف مبروك
للزوار لانهم هايطلعوا علي تجربة انسانية انا متاكد انها عبقرية وجديدة وفيها اضافة انها خارجة من مدرسة الاخوان
سؤال اخير
هو انت ليك علاقة بالانسة كونداليزا رايس
اصلها صاحبة مصطلح الفوضي الخلاقة
وانت مسمي المدونة الفوضي المنظمة
يا خوفي يا شاهنشني تكون مظبط مع كوندي
ويللا مش مهم

mohamed said...

مبروك يا شاهنشي

نورت عالم التدوين

هنشوفك بقي يا بشمهندس اول فوضوياتك المنظمة هتكون عاملة ازاي

:)


دوس يا شاهنشي

محمد سامي said...

شاهينشي...أزيك ياد عامل ايه؟ فاكرني؟ انا محمد سامي بتاع اتصالات..فرحت اوي لما رشوان قالي انك عملت مدونة (سبحان الله حتى انت بتعمل مدونه..صحيح دي هتلم). المهم انت واحشني اوي..بقولك مش هينفع نعدي فرح عبد الرحمن رشوان من غير من نقطع نفسه..بجد واحشني جدا..مستني ابداعاتك اللي تشل يا جميل

SHAHEENSHY...فوضى منظمة said...

شرقاوووووه
أخويا الطويل
الكلام اللي انت بتقوله لا ينافي ان الفوضى ممكن تكون منظمة حتة ولو في جانب بسيط من جوانبها
ربما محدثوا الفوضى لا يدركون في المرة الاولى كل المعطيات والنتائج لكن على من سيكررورن التجربة ان يبدءو من حيث وصل الاخرون

لو سمحت متتعلقش في رقبتي تاني

SHAHEENSHY...فوضى منظمة said...

أستاذ مجدي ..تعليق حضرتك عندي يساوي الكثير جدا جدا جداااااااا

شرفتني يا استاذ مجدي...بالنسبة لموضوع كوندي ...انا مش مظبط معاها والله خالص ..متشبهناش بقى من أولها يا استاذ مجدي ..وبعدين مظبط ازاي يعني ..الكلمة تحتمل اكتر من معنى يا استاذ مجدي

بالتوفيق

SHAHEENSHY...فوضى منظمة said...

محمد...جزاكم الله خيرا على تعليقك..بالتوفيق

SHAHEENSHY...فوضى منظمة said...

محمد سامي...ازيك يا ابني ..عامل ايه ..انت ليه متهضني وبتحاول تعملك انصار كمان ..انا ميهمنيش الكلام ده ..وانا ابدعاتي تشل !!..فاكر اما كنت بوريك رسوماتي في الكليه..انت كنت ناسي افكرك
بالتوفيق

إسلام أبو الفتوح said...

نعم هى فعلا فوضى انك تعمل مودونه من غير ما تقولى بس يلا مشهم المهم انك هتدون ودى حاجه كويس علشان متكتمش فى نفسك ويحصلك حاجه وا متأكد ان مدونتك هتكون اضافه قويه لمدونات شباب الاخوان
واتمنى لك التوفيق ورنا يتقبل منك الفوضى دى

ومضات .. أحمد الجعلى said...

ايه ياعم شاهيشنشى؟؟

انت لسه عمال تلم الورق اللى اتبعتر بتاع اينشتاين؟؟

مايللا خش بينا على المفيد فى انتظار الابداعاااات الشاهينشية

أبو الفـــداء said...

أهلا بك في عالم التدوين..

انطلق

SHAHEENSHY...فوضى منظمة said...

اسلام أبو الفتوح

هي مش فوضى اني لم أقل لك عن المدونه ..دي قلة ادب مني ..بس والله انا عارف اللي انت فيه فمرضتش ازعجك
على العموم انت شرفت المدونة..وعقبالك بقى

SHAHEENSHY...فوضى منظمة said...

أبو الفداء

جزاكم الله خيرا على تعليقك

SHAHEENSHY...فوضى منظمة said...

جعجوعي

تعليقين في تدوينة واحده...ده كتير أوي

قريبا ان شاء الله

safealeslam said...

ايه الفوضى ديه

مين اللى عامل دوشة هنا ده

مبروج على المدونة و يا رب نستفيد منك

بس لو كل بوست هايبقى بالمنظر ده و اناشدين و الناس الغريبة ديه

كده يبقى مش هاستفيد

انا قعد اقرأ البوست اكتر من ربع ساعة علشان افهم حاجة بالذات التجربة الغريبة ديه

على فكرة صورتك جامدة جدا ... اول مرة اعرف انك مبدع فوتوشوب كده

سياف

ومضات .. أحمد الجعلى said...

سيف الإسلام بيقول صورتك جامدة!!!

الراجل ما يعرفش الفوتو شوب بيعمل ايه فى الناس ولا ايه

زمان كانوا بيقولوا لبس البوصة تبقى عروسة
والآن يقولوا اتعلم لك حبة فوتو شوب تبقى عريس

اسماء العـــــــريان said...

الف مبروك اخ شاهين لدخولك عالم التدوين .. واسفين اذا جت متاخرة

وان شاء الله هتبقى من افضل المدونات

SHAHEENSHY...فوضى منظمة said...

سيف
شرفتني يا حبيبي والله .. وبالنسبة للفوتو شوب نبقى نتكلم بعدين

بالتوفيق

SHAHEENSHY...فوضى منظمة said...

يا جعلي لو سمحت بطل الاشاعات اللي عمال تقولها علياخاصة عن مشروع التخرج وشكلي وشعري .. انا بوصة؟؟!!!لا وبقيت عروسة..مش عيب يا دكتور..انا زي مكنت بقول لناصر صديقك .. مش هرد عليك عشان انا مؤدب ومامي مربياني..ومتكلمش عن الفوفوشوب بعد كده

بالتوفيق

SHAHEENSHY...فوضى منظمة said...

اسماء العريان
جزاكم الله خيرا على تعليقك

أحمد السباعـي said...

يااااااااااااه كل الناس دهلت قبلي وعلقت
بجد انا زعلان اني مش علقت من زمان

بس انت عارف اللي يخطب ياما هيشوف فما بالك بالعقد كمان


بجد بجد ألف ألف مبرووووووووووووووك دخولك عالم التدوين
وأول ماقرأت فوضى منظمة افتكرت قهوة
ايه ايه أحمد ؟؟
بكساوي سكرابي المهم
لما كنا بتكلم عن التنظيم والعفوية


كلمة حق ولازم أقولها
انت منظم أوي والكل عارف كده
السؤال بقى
ليه بتحاول تبان انك بتحب اللخبطيطة
يعني الفوضى ؟؟؟؟؟؟؟
لأ وايه كمان فوضى منظمة

وعجبي
ومرة تانية ألف ألف مبرووووووووووك دخولك عالم التدوين

محمد عبد القوى said...

أستاذ شاهينشى:
أولاً وقبل كل شيء أعترف أنا الموقع أعلاه بأنى سعيد جداً بزيارتى لمدونتك فوضى منظمة
أنا عملت زى ما انت قلت وقريت البوست الأول قبل أى بوست تانى وأسجل أعجابى الشديد بيه
ثانياُ:عندى سؤال بسيط خالص..ياترى أنت أستوحيت اسم مدونتك من فيلم حالة فوضى chaso
ولا ده أبتكارك..سواء كان كده أو كده فهو أسم هايل
ثالثاٌ: أخبرك أن ذوقنا فى الأفلام واحد تقربياً ..انا بحب توم هانكس جداً وخصوصاً فورست جامب و you have got mail

قلمي said...

سعدت جداااااااا بتعرفي علي هذه المدونه
كما اعجبتني عبارتك (أخذت القرار... والقرار ليس الفرار ... وانما المواجهة) وقد صدقت فيها فالتدوين للبعض مجرد فرار من واقع خانق وكونك نفيت فرارك واعتبرته مواجهه هو امر تحمد عليه

__________
اما بالنسبه للفوضي المنظمه وراي الحاج اينشتين كما سميته : فانا اتفق معك في ان لكل شيء نظامه حتي الفوضي ولعلنا ان ادركنا ذلك تحررنا من فكره الصدفه ولفظ الفوضي وادركنا ان كل شيء منظم له اسبابه ولكل سبب نتيجه لذا فلا شيء ياتي بلا نظام في هذا الكون ,لكن عقولنا هي التي ترغب في تفسير اللا مفهوم بالفوضي والغير مبرر بالصدفه رغبه منا في اراحة انفسنا وعدم احراق المزيد من طاقتنا في التفكر والتمعن للوصول الي المسببات الكامنه وراء اي حدث .
__________

الطفلة العجوز said...

وجهة نظر رهيبة علي فكرة
0__0

يبدو اني سأكون من الزوار الدائمين لهذه المدونة علني افهم ...او اتعلم اي شئ ...حتي ولو كان فوضاويا
:))

Anonymous said...

أول مرة بشوف واحد بيوافق اللي ببالي
فعلا الفوضى منظمة وهي قمة الانتظام
لك تحياتي
أنس

سلمى *ساجدة للرحمان* said...

شد انتباهى جدااا العنوان ولما قرأت تفسيره أقنعنى جدااا
ربنا يجعل المدونه دى فى ميزان حسنتك

Anonymous said...

عجبنى اوى طريقتك فى الكلام عن الفوضى

ومقنعه الى حد كبير

بس تفتكر إن الفوضى مهما بلغت بتفضل داخل نظام محدد

ولو خرجت فى يوم من الايام عن نظامها

هنسميها فوضى ايه

al3soOola said...

عجباني بجد الفكرة

كنت سماعة عنها بس م كنت مقتنعة بيها بس لما قرات اقتنعت

ثانكس يا قمر