Thursday, August 30, 2007

عالم الأفكار


لماذا أكتب عن عالم الأفكار؟
منذ فترة وأنا أفكر في أننا كثيرا ما نقيم الأفراد والشخصيات على أساس أفكارهم المجردة .. ونتغاضى عن عناصر أخرى للتقييم أهمها ممارسات الأفراد وتصرفاتهم على أرض الواقع .. أنا رصدت هذه الظاهرة خاصة بعد انتشار المدونات التي تجسد عالم الأفكار .. حيث وجدت أن نظرة بعض الأفراد الي بعض المدونين قد تغيرت بسبب ما يكتبوه بمدوناتهم على الرغم أن كثير مما أعرفهم من هؤلاء المدونين منضبطين على أرض الواقع وتصرفاتهم محمودة ويلتزمون دائما برأي الجماعة ويفعلون برأي الجمهور..ومن هنا ...هل نقيم الناس بناء على أفكارهم المجردة فقط؟؟


عالم الأفكار
هو عالم مفتوح لا حدود له .. ينطلق فيه العقل بدون ضوابط وقيود ليصل الي الفكرة ..ثم يقف هنا .. ولا ينزل بها الي أرض الواقع إلا إذا كان الظرف الزماني والمكاني والنسق والمحيط الإنساني مناسب


بعض خصائص عالم الأفكار
عالم مفتوح لا حدود له إلا المحرمات الدينية*

قابل للنقض والمناقشة*

قابل للإقناع من عدمة*

لايوجد به صحيح مطلق أو خطأ مطلق (ابيض و أسود)..وأنما يوجد دائما مساحة رمادية مشتركة ..لكن نحتاج الي بحث وإعمال العقل
كي نصل اليها

لا يعبر بالضرورة عن شخصيات وقناعات صاحب الفكرة*

ليس الغرض الوحيد من عرض الفكرة إقناع الغير بها..ربما يكون الغرض هو عرض الرأي الآخر أو الاستثارة الذهنية أو الإيحاءات الفكرية أو المستقبلية


من الآخر
أصبت بصدمة عندما علمت أن من المدونين من يكتم أفكاره حتى لاتتغير نظرة الناس له خاصة المنتمين الي الحركة الاسلامية .. فعلى من يكتبون أن يعبروا بحرية عن أي شيء خاصة بهم أو بالمجتمع أو بالسياسة أو بالحركة الاسلاميه .. ولكن يلتزموا بحسن العرض وضوابط المحتوى الزماني والمكاني والنسق القيمي والمجتمعي والانساني .. وعلى من يقرأون خاصة ممن لهم دور تربوي ألا يقيموا المدونين بناء على ما يكتبوه أو يعرضوه في عالم الأفكار فقط .. وانما بناء على ممارستهم في عالم الواقع


في الآخر
وفي الاخر كل الكلام اللي سبق .. ربما يكون صواب أو خطأ .. لكن هذا رأي في عالم الأفكار

31 comments:

محمود قطب said...

قشطتين عليك يا شاهنشي مش قشطة واحدة
والله أول ما شوفتك قلت الراجل أبو شعر طويل ده فنان أو فيلسوف أو مفكر لكن المهم إني كنت متأكد أنك مبدع

أحنا فعلا محتاجين نتعلم أزاي نعيش في عالم الأفكار
وحابب أضيف حاجة أنه لولا هذا العالم ماأهتدينا إلى الله وإن ربنا هو الذي أمرنا بهذه العبادة

وبقول لنفسي ولكل إنسان ولكل مسئول بالله عليك أوعى تمارس الأرهاب الفكري

يعني أنك تموت كل فكرة جديدة أو إنك من غير ما تقصد تحقر من رأي غيرك أو تحسسه إنه عمل مصيبة لمجرد أنه فكر

لان ربنا سبحانه وتعالى يحاسب على العمل لا على التفكير ولأن الفكرة ديه أو الرأي ده منكن فعلا يكون حل لمشاكل كتيير

عصفور المدينة said...

مقالة رائعة
ولكن فيها تكليف بما لا يطاق أحيانا فليس مطلوبا من جميع الناس أن يعرفوا الشخص قبل أن يحكموا عليه إلا من خلال كلامه
وربما هذا يلفت الانتباه إلى ضرورة أن يوضح الناس جوانب من شخصياتهم
والمحاذير التي حول الكلام

Ahmed Ismail said...

انا شايف ان الةاحد يكتب بتحفظ خوفا من ان يؤثر ما يكتب على الراي العام اذا كان المحتوي غير مناسب عرضه الآن
لان لو الموضوع اصبح مفتوح ممكن يسبب مشاكل الوطن في غني عنها الآن

SHAHEENSHY...فوضى منظمة said...

محمود قطب .. يا عم أنا بربي شعري كده يعني .. وانا صغير مكنوش بيحاقولي غير فين وفني ..لكن يا عم أنا مش اللي انت قلت عليه خالص .. وعلى العموم جزاكم الله خير

بالنسبة لموضوع الالارهاب الفكري . فالموضوع ده أصبح مستشري فعلا .. والمشكله أن احنا ساعات بنمارسة بشكل غير مباشر..جزاكم الله خير على المداخلة

SHAHEENSHY...فوضى منظمة said...

عصفور المدينة
مش عايز اقعد أقولك زي ما الجعلي بيقولك .. عصفور المدينة يغرد على اغصان المدونة ..والكلام الكبير ده..جزاكم الله خير على زيارتك .. ولو أني بختلف معاك شويه .. أنا قلت ان حكمنا الكامل لا يكون عن طريق كلام الأشخاص أو أفكارهم فقط .. ولكن في حاجات تانيه لازم نقيم بها الأفراد وانا أرى أن هذا ليس تكليفا بما لا يستطاع...بالتوفيق

SHAHEENSHY...فوضى منظمة said...

أحمد أسماعيل .. أزيك؟؟كلام ايه يا احمد اللي هيبقى فيه خطر على الوطن؟؟!!!لو احنا التزمنا بخصائص وقواعد عالم الأفكار بيتهيقلى هيبقى الوطن هو اللي كسبان ..بالتوفيق

FAWZYYY said...

أنا قلت أخد شرف التعليق رقم 7
و بعدين ربنا يسهل بقى و لما أشوفك أناقشك فى الموضوع ده
لأن انا مش متفق معاك فى بعض الحاجات
أهم حاجة أخدت شرف التعليق رقم 7
كان نفسي آخده من زمان أوي
الحمد لله يا رب
بس عالماشي كده انت فى حاجات ممكن متقولهاش غشان مينفعش تتقال و مش مقيدة بالضوابط اللى انت قلتها دى خالص
و جزاك الله خيرا

شقلبان said...

طيب انا التدوينة دي لمست شئ في قلبي خصوصا الجزء بتاع "من الآخر"

انا عاوز اقول اني شخصيا ساعات بكتم حاجات جواية مش عشان الناس متاخدش عني فكرة وحشة

ده لاني بحس ان الناس مش هتفهمني
او ساعات بكتب كل اللي في نفسي وناس تيجي تسألني فيه علي أرض الواقع

مع اني لو عاوز اتناقش فيه علي ارض الواقع كنت اتناقشت

هي دي المشكلة
ان الناس بتعتبر كل ما يكتب في المدونة قابل للنقاش علي أرض الواقع وهذا غير صحيح في رايي


وبتكون النتيجة النهائية ان الواحد مبيكتبش الا اللي ممكن الناس تناقشه في وجها لوجه


مع انهم لو ناقشوني فيه من خلال المدونة او من خلال الكتابة هيلاقو مني رد وتنفاعل

لكن فعلا في حاجات مبحبش اتكلم فيها علي أرض الواقع


شكلي كده بخرف
خييير خيير

Abeer said...

أصبت بصدمة عندما علمت أن من المدونين من يكتم أفكاره حتى لاتتغير نظرة الناس له خاصة المنتمين الي الحركة الاسلامية .. فعلى من يكتبون أن يعبروا بحرية عن أي شيء خاصة بهم أو بالمجتمع أو بالسياسة أو بالحركة الاسلاميه .. ولكن يلتزموا بحسن العرض وضوابط المحتوى الزماني والمكاني والنسق القيمي والمجتمعي والانساني .. وعلى من يقرأون خاصة ممن لهم دور تربوي ألا يقيموا المدونين بناء على ما يكتبوه أو يعرضوه في عالم الأفكار فقط .. وانما بناء على ممارستهم في عالم الواقع



متفقة معاك في معظم الكلام وبحييك عليه
بس مختلفة معاك في نقطة .. وهي اني مقيمش اللي قدامي باللي بيكتبه لكن بممارسته في الواقع
مختلفة معاك لان مش كلنا الفرصة بتتيح لنا اننا نشوف الشخص ده بيتصرف في الواقع ازاي او بيطبق افكارة اللي بيكتبها او لا

مختلفة معاك .. لان القاعدة .. ان كتاباتي بتعبر عني .. بصورة او باخرى .. ايا كانت نسبة صحة الصورة ديه اد ايه

لكن اللي بيحصل من البعض .. هو شذوذ عن القاعدة .. مش لازم اعملة قاعدة تانية الغي بيها القاعدة الاصلية

حد فهم حاجة
:)

صاحب البوابــة said...

موضوع قيم ومدونة رائعة حقا

سعدت بإكتشافها

تحياتي عزيزي

SHAHEENSHY...فوضى منظمة said...

أزيك يا حج فورزي .. الأرقام كلها هتخلص قريب أن شاء الله .. أنا على فكرة قلت نعمل حساب المحتوى الزماني والمكاني ..يعني ممكن نطرح كل الأفكار بس بشكل وصيغة تناسب الظرف .. دي وجهة نظري .. وجزاكم الله خير

SHAHEENSHY...فوضى منظمة said...

دكتور شقلبان .. انت مبتخرفش ولا حاجة .. أنت بتقول كلام محترم جدا .. أنا رأيي أن هناك دائما صيغة مناسبة لطرح الموضوع .. تناسب عقل ومشاعر ورح الكاتب .. وتناسب الجمهور ايضا .. وعلينا دائما أن نبحث عن هذه الصيغة .. وهي دي حلاة المدونات .. أنك هتخليك مبتكر جدا في عرض فكرتك وتوصيلها للجمهور ..بس ميوصلش بينا الأمر الي كتم الأفكار .. بالتوفيق .. وجزاكم الله خير

SHAHEENSHY...فوضى منظمة said...

عبيير .. جزاكم الله خير على تعليقك وشرفتني زيارتك .. أنا بصراحة مقولتش انا احنا منقيمش الناس عن طريق أفكارهم .. أنا قلت ميبقاش التقييم الكامل بناء على أفكارهم فقط .. طيب ..وبعدين أفرضي حضرتك اني أنا بطرح رأي لا يعبر عن قناعتي الشخصية .. وانما يعبر عن وجهة نظر أخرى يجب طرحها لتكتمل الصورة .. أو لاثارة الذهن .. أو حتى من باب الترف الفكري .. ثم حضرتك تحاسبيني وتحكمي عليا بيه ؟؟!!هو ده اللي أنا أقصده .. أرجوا أن أكون وضحت .. بالتوفيق

SHAHEENSHY...فوضى منظمة said...

صاحب البوابة .. شرفتني زيارتك .. وجزاكم الله خير .. وشكرا لثناءك على المدونة ... بالتوفيق

وائل_صح ولا غلط_ said...

جزاك الله خيرا يا شاهنشي
انا متفق معاك في كثير من اللي قلته
وموضوع في الجون بجد
بس في نقطه مش عارف يمكن انا اللي مش فاهمها اوي


الاوهي_ده رأيي الشخصي_ انك لو تبنيت فكره ما يبقي اكيد لازم تعبر عنك وعن شخصك لانك هاطبقها زي مانت قلت لمايكون الوقت مناسب

اما لو بتقول الفكره دي لاثارة الذهن او لعرض رأي اخر زي مانت قلت في التعليق الاخير طبعا ماينفعش احكم عليك بيها
بس كده خلاص عشان انت في التدوينه فلت غير الكلام ده
ولا ايه رأيك يا بو شاهنشي

محمود سعيد said...

قشطتين ثم قشطة


والله الناس اللى بتخاف من عالم الأفكار عندها فوبيا فكر


والتقييم بناء على الأفكار صحيح مش غلط
بس العمل محل التطبيق هو الأولى بالتقييم

ده حتى حساب ربنا على العمل مش على صوركم وأعمالكم ولا حتى أفكاركم
والأفكار لا هى بذنوب ولا بحسنات

وناس كتير مش مستوعبة أنه ممكن الفكرة تكون كويسة بس اللى قالها عبر عنها بشكل موصلتش معاه الفكرة بالشكل الجميل بل إنقلبت بسوء الظن وبالفوبيا إلى أفكار منحلة خارجة :-)

SHAHEENSHY...فوضى منظمة said...

وائل .. جزاكم الله خير .. مفيش حاجة مش مفهومة ولا حاجة .. أنا قصدت بأخر فقرة خالص ..أني أقول بوضوح أن ده رأيي..لكن ممكن جدا في أي مقال تاني مقولش أني أنا أقيد هذا الرأي بهذه الصراحة زي ما هو في التدوينة دي .. وجزاكم الله خير يا وائل .. لفتاتك ديما هي اللي في الجون

SHAHEENSHY...فوضى منظمة said...

محمود سعيد .. انا معرفش ايه حكاية القشطة مع المدونة دي .. المهم أنا بصراحة عايز أكد على كلمتك .. بس العمل محل التطبيق هو الأولى بالتقييم .. جزاكم الله خير

اسماء العـــــــريان said...

غدا الاثنين 3 سبتمر
استئناف قرار الحبس بالتجديد 15 يوم لمجموعة الدكتور عصام العريان ومن معه

فى محكمة شمال القاهرة بالعباسية

الساعة 10 صباحا

ارجو ممن يريد التضامن معنا ان ياتى

ومضات .. أحمد الجعلى said...

الأفكار وآآآه من الأفكار

الأفكار هى التى تقود احيانا أصحابها لاعواد المناشق، وللبقاء خلف القبان، وللقهر، واحيانا تقود صاحبها للسلطة والشهرة والمجد

الأفكار هى التى قد تدفع صاحبها للجنون أو التمرد او استحالة العيش، وهى ذاتها قد تدفعه للابداع والتميز

بالتأكيد الأفكار ليست مجرد تفاعلات كيميائية فى خلايا المخ، بل هى فى الحقيقية هوية وكيان وتاريخ صاحبها وثقافته

فعلا يا مشمهندز الأفكار كما قلت فى العنوان "عالم الأفكار" فهى حقا عالم كامل له قوانينه وضوابطه وآلياته وأضراره ومكاسبه

وربما جدير بنا إن كان لدينا فعلا أفكار، ان نتعلم كيف نتعامل ونسوق هذه الأفكار

محمود قطب said...

معش منكن أسئل دكتور جعلوني سوأل
ما هي أعواد المناشق التي تتكلم عنها

أنا عارف إن حضرتك ضليع في اللغة
وأكيد دي كلمة جامدة

بس أعمل أيه بقى في ثقافتي المحدودة
هاهاها

ومضات .. أحمد الجعلى said...

اعواد المناشق دى يا سيد قطب مأخوذة من "منشق" فهى "مناشق"

وانا بأحذرك لأنك بقيت بتقرب جدا منها بتهكمك على كتاباتى
(:

محمود قطب said...

يا بشمهندس شاهنشي أنا كده بتهدد في مدونتك

وبطالبك بتوفير الحماية لكل زوار المدونة

SHAHEENSHY...فوضى منظمة said...

أحمد الجعلي و محومد قطب..أنتو هاتتخنأو عندي في المدونة ولا أيه .. عايزين تثيروا القلائل وتعملو كشح في المدونة .. أنا مش هسمح بده أبدا.. على العموم جزاكما الله خير ..والعبوا مع بعض متتخنقوش

ومضات .. أحمد الجعلى said...

الله أكبر ولله الحمد

شفت يا محمود قطب، انا لم أغلط فيك، انما الباشمهندس شاهين اللى انت استشهدت واستنجدت بيه قال عليك
"محومد قطب"

يعنى لما ان أقول "اعواد المناشق" بدلا من "المشانق" تبقى مش حاجة عيب

اللهم لك الحمد

(:

محمود قطب said...

اللهم إخذيك ياشوشو

أنا كنت ناوي أغلط من الأول
بس قلت عيب ده برده أستاذك ومربيك

فقلت أشوف واحد من سنك يجيبلي حقي

ولكن الأن ليس أمامي مفر من الغلط وحضرتك عارف إني أنتمي إالى كلية تجارة العظمى

فميثاق الشرف اللي عندنا يفرض علي الرد

بس أنا مش هشتم علشان رمضان كل سنة وانت طيب

بس أنا هكتفي إن في شويت صور وثائقية ألتقطنها لحضرتك وللبشمندس كمان

علشان نستخدمها في وقت زي ده

The Last Samurai said...

شاهينشي ... أولا أنا عايز أقولك أني بقالي فترة من ساعة ما قريت عنوان البوست و أنا عمال أفضي لنفسي وقت أقراه فيه و أمخمخ كده عشان العنوان عجبني بصراحة

ثانيا .. أما قررت النهاردة أقرا افتكرت اني وعدتك بقراية المدونة كلها و داه محصلش و مش باين أنه هيحصل قريب عشان المشاغل بس أنا عايز اقولك أني ما فوتش بوست كتبته من ساعة أما اكتشفت مدونتك

فقولت أعوض و أقرا أول بوست اللي عنوانه فوضى منظمة و في التالي تعليقي على الموضوعين و أتمنى الا أطيل وأن تعذرني إذا فعلت


أولا بالنسبة للفوضى المنظمة ... أنا مؤمن جدا أن لكل شيء ربي خلقه قانون يحكمه و نظام يتحكم فيه حتى لو بدا المنظر من الظاهر عبثيا و فوضويا ... إلا أن هذا ناتج عن جهل الإنسان و محدودية فكره الغير قادر على استيعاب الكم الهائل من المعلومات الذي يمكنه من فهم الفوضى و أن لها نمط معين يمكن رؤيته يتكرر مرة بعد أخرى دون أن نلاحظ هذا ... من هذا المنطلق فلا شيء ... لاشيء البتة يمكن الحكم عليه أنه فوضى و بالتالي غير جدير بمحاولة الفهم و التأمل حتى لو بلغ من منازل الفوضى ما بلغ ... و بالطبع الأفكار على رأس هذه الأشياء
فعلى هذا ... أعلن أني بصدد محاولة فهم أفكارك و إدراك النمط الذي يميزها لكي أحاول أن أفهم النظام الحاكم لها على سبيل أن أتعرف على فطرتك و ما يميزك كمخلوق خلقه الله برؤية و إدراك و فهم مختلف و مميز و متفرد شأنك شأني شأن كل إنسان على سطح البسيطة

ثانيا تعليقا على عالم الأفكار و في نفس السياق ... أولا لم أتفق معك في كل ما ذهبت اليه ... إذا لم يعبر فكر الإنسان عن كيانه و شخصيته بل و عن دينه و قناعاته فماذا عساه أن يفعل؟

غياب القدرة على التعبير عن تلك الأفكار بجرأة ووضوح هي مشكلة العرب عموما و المصريين خصوصا و هي مشكلة لها أسباب عدة ... الخجل ... الخوف ... الجبن ... في بعض الأحيان الرغبة في النفاق و التملق و التمشي مع الأغلبية حتى و إن كانت على خطأ

بالتالي ... أكون مسلما فقط بإعلاني أن لا إله الا الله و أن محمد رسول الله و عدم إرتكاب ما يخرجني من الملة لأما ما دون ذلك في حرية الفكر و فمباح و لا يجوز الحكر عليه

مشكلة المسلمين الأن أنهم أصبحوا يخشون مجرد التفكير لا خوفا من الخروج من الملة و لكن خوفا من الرأي السائد و مناخ التخلف و الجهل المستفحل

و الذي بالضرورة سببه غياب المعرفة و القراءة في المقام الأول

أتمنى عليك أن تستمر في مناقشة عالم الأفكار و أن تبحر أكثر فيه

هذا و بالله التوفيق

اسماء العـــــــريان said...

اليوم السبت الموافق 8-9

مؤتمر فى نقابة الصحفيين بعنوان

سجناء سبتمر بين الحاضر والماضى

ويحضره الاستاذ محمد عبد القدوس

بعد صلاة المغرب

ارجو ممن يريد التضامن ان يذهب

ارجو النشر

Ahmed Ismail said...

you have to call me for important matter

SHAHEENSHY...فوضى منظمة said...

عزيزي الساموراي الأخير .. جزاكم الله خير على تعليقك المهم جدا جدا جدا ..ربما نكمل النقاش في مرة لاحقة ..أكيد هنكمله أن شاء الله لو كان في العمر بقيه ..بس الظروف مش مواتيه دلوقتي ..أنا آسف جدا

أحمد سليمان said...

ازيك يا ريس عجبتني مدونتك علي فكره انا جبتها من عند محمود سعيد تقريبا

المهم هوا ما اعتقدش فيه فرق بين افكار الشخص و قناعاته و تصرفاته في الواقع لكن هوا زي ما انت قلت عند التفكير بيكون حر و مفيش قيود لكن لما بييجي ينزلها علي الواقع بيلاقي قيود فبيطبق اللي يقدر عليه و مش معني كده انه مش بيطبق افكاره لإنه أكيد بيطبق بعضها و البعض الآخر لما تيجي الفرصة