ذكريات مضحكة عن أسئلة معضلة

انا كنت برتب غرفتي حسب تعليمات خفر سواحل شقتنا .. المهم وانا برتب الغرفة وجدت مجموعة من الاوراق كنت احتفظت بها من ساعة تخرجي .. وما إن وجدت هذه الأوراق إلا وانفجرت ضحكا - على فكرة أنا أحد مشكلاتي إني بضحك في أي وقت ومبعرفش أمسك نفسي خالص وده بيوقعني في مشاكل كتيير هبقى أحكيلكم عليها بعدين - المهم قعدت أضحك ضحك هستيري لدرجة إن أمي بقت تضحك على ضحكي

الورق ده كان عبارة عن بعض الامتحانات اللي كانت فيها شوية أسئلة بجد تهلك من الضحك .. كانت الأسئلة صياغتها عجيبة جدا .. لدرجة إني كنت بضحك في الامتحان بصوت عالي .. المهم هقولكم بعض الاسئلة ... خد عندك يا سيدي

السؤال الاول
تشير الدراسات السيكولوجية في علم الجمال الي ان المباني على اختلاف طرزها تحوي درجات متفاوته من الحياة والتعقيد تتناسب مع ما تتضمنة من خصائص معينة في النظام التشكيلي
في ضوء العبارة السابقة اشرح باختصار
العلاقة بين الادراك الوجداني الفطري وخصائص الحياة والتعقيد من حيث التفسير العلمي للظاهرة وكيفية عملها (نعم..هه..نعم)؟؟

السؤال التاني
تعددت طرق دراسة المجال المعماري من وجهة النظر الادراكية والسلوكية فيما بين الاتجهات التحليليه الادراكية مثل مدرسة الجيشتالت الفكرية والاتجاهات الاكثر علما في الجماليات البيئية مثل نظرية المرصد والملاذ لابلتون أو المصفوفة المعرفية لكابلن وكابلن( مش عارف ازاي) أو الاستثارة البيئية المثالية لبيرلاين أو غيرهم...ناقش
انا قعدت أقرأ السؤال ده ثلاث مرات كل ما اوصل لاخرة أنسى أوله وأقعد أضحك وبعدين أقرأه تاني ..وهكذا دواليب
طبعا انا السؤال ده ناقشتة مناقشة مقولكش .. في صفحتين .. بس ايه تناولته من حيث كينوناته الداخليه من خلال البعد البؤري للامان ياللي..على رأي صديقي فضفضة

سؤال اخر
ينادي البعض ان ادراك المجتمع لفن العمارة يكون عن طريق الادراك الحسي وينادي آخرون أان الإدراك يكون ادراك ذهني...وضح مستعينا بأمثلة .. وطبعا الفرق جلي بين الادراك الحسي والذهني

حد فاهم حاجة؟؟
المهم انا هيبقى عندي تعليق عام عن هذه التدوينة .. بس بعدين بقى عشان مطولش عليكم