Thursday, August 30, 2007

عالم الأفكار


لماذا أكتب عن عالم الأفكار؟
منذ فترة وأنا أفكر في أننا كثيرا ما نقيم الأفراد والشخصيات على أساس أفكارهم المجردة .. ونتغاضى عن عناصر أخرى للتقييم أهمها ممارسات الأفراد وتصرفاتهم على أرض الواقع .. أنا رصدت هذه الظاهرة خاصة بعد انتشار المدونات التي تجسد عالم الأفكار .. حيث وجدت أن نظرة بعض الأفراد الي بعض المدونين قد تغيرت بسبب ما يكتبوه بمدوناتهم على الرغم أن كثير مما أعرفهم من هؤلاء المدونين منضبطين على أرض الواقع وتصرفاتهم محمودة ويلتزمون دائما برأي الجماعة ويفعلون برأي الجمهور..ومن هنا ...هل نقيم الناس بناء على أفكارهم المجردة فقط؟؟


عالم الأفكار
هو عالم مفتوح لا حدود له .. ينطلق فيه العقل بدون ضوابط وقيود ليصل الي الفكرة ..ثم يقف هنا .. ولا ينزل بها الي أرض الواقع إلا إذا كان الظرف الزماني والمكاني والنسق والمحيط الإنساني مناسب


بعض خصائص عالم الأفكار
عالم مفتوح لا حدود له إلا المحرمات الدينية*

قابل للنقض والمناقشة*

قابل للإقناع من عدمة*

لايوجد به صحيح مطلق أو خطأ مطلق (ابيض و أسود)..وأنما يوجد دائما مساحة رمادية مشتركة ..لكن نحتاج الي بحث وإعمال العقل
كي نصل اليها

لا يعبر بالضرورة عن شخصيات وقناعات صاحب الفكرة*

ليس الغرض الوحيد من عرض الفكرة إقناع الغير بها..ربما يكون الغرض هو عرض الرأي الآخر أو الاستثارة الذهنية أو الإيحاءات الفكرية أو المستقبلية


من الآخر
أصبت بصدمة عندما علمت أن من المدونين من يكتم أفكاره حتى لاتتغير نظرة الناس له خاصة المنتمين الي الحركة الاسلامية .. فعلى من يكتبون أن يعبروا بحرية عن أي شيء خاصة بهم أو بالمجتمع أو بالسياسة أو بالحركة الاسلاميه .. ولكن يلتزموا بحسن العرض وضوابط المحتوى الزماني والمكاني والنسق القيمي والمجتمعي والانساني .. وعلى من يقرأون خاصة ممن لهم دور تربوي ألا يقيموا المدونين بناء على ما يكتبوه أو يعرضوه في عالم الأفكار فقط .. وانما بناء على ممارستهم في عالم الواقع


في الآخر
وفي الاخر كل الكلام اللي سبق .. ربما يكون صواب أو خطأ .. لكن هذا رأي في عالم الأفكار

Friday, August 24, 2007

التوريثوفوبيا .. أفكار أبويا


صحيت من النوم الصبح في احد الأيام ولقيت أبويا الحج كالعادة بيتصفح الجرائد ومنها الدستور اليومي والأهرام ..وبعدين لقيته بيبصلي ويقولي .. هو ايه ؟؟!!همه الناس اللي مامتهم مش كويسة اللي ماسكين البلد فاكرين أنهم هيورثوا الواد فدانين في المنوفيه؟؟ هي فوضى؟هم فاكرين الناس هتسكت؟؟


قلتله أيوه ؟؟ الناس للاسف هتسكت؟؟والتوريث هيحصل دون أدنى مشكلة للنظام؟؟الناس خلاص ما بقاش فارق معاها ..بالعكس في ناس مش حاسة انه في مشكلةأصلا ؟؟وناس مبسوطين وبيقولو احنا عايشين كويس ومبارك ده ميه ميه .. عملينا كباري وطرق ومترو الانفاق والدي اس ال وخلى الترلي يعدي من البيت .. ربنا يكرمة


قالي مهو المصيبة الناس دي مش فاهمة نظرية التطور الطبيعي للحاجة الساقعة؟؟

قلت : اه الحج واضح ان التلفزيون اثر عليه ؟؟؟المهم قلتله: أيوه يا بابا بتقول عايز حاجة ساقعة؟؟


قالي : أنا مبهزرش .. الدنيا كلها بتطور تتطور طبيعي جدا .. يعني لو أي حد مكان مبارك كان هيعمل اللي هيعمله .. يعني ارجع لأي بلد في مستوانا من الثمانينات هتلقيها دلوقتي ز ينا بالضبط يمكن متقدمة عننا؟؟لأن العالم بيمر بحلقات متشابهه من التطور وبالتالي كلنا بنتطور تتطور طبيعي ..يعني التطور اللي في الاتصالات مثلا حصل في العالم كله مش عمله مبارك؟؟ قلتله عندك حق ..بس يا بابا موضوع التوريث ده أيه الحل فيه ؟


فاصل تدويني


اللي مامتهم مش كويسه .. ده مصطلح اتفقت عليه أنا وبابا منذ سنه تقريبا .. بابا كان ديما أما يجي يتكلم عن النظام كان بيقول النظام ابن..$%^ تيييييييت ( لفظ يعني ان مامتهم مش كويسه) قلتله في مرة مبلاش يا بابا اللفظ ده .. هم ميستهالوش ان احنا ناخد فيهم سيئات كمان ؟؟ قلتله نبقى نقول ان مامتهم مش كويسة .. ومن ساعتها واحنا بنقول كده .. طبعا انا قصدي أن مامتهم معرفتش تربيهم عشان كده هي مش كويسة .. مش عشان حاجة تانيه


عدنا


قلتله ؟أيه الحل في موضوع التوريث ده يا بابا ؟؟

قالي ..الناس لا زم يبقى عندهم توريثو فوبيا ؟؟ قلت ضاحكا .. توريثو فوبيا؟؟أنت مزاجك عالي أوي النهاردة

ّ قالي أه .. الناس أول ما تسمع كلمة توريث كأنها قرصها تعبان أو شافت عفريت

قلتله طب ازاي الناس يجلها تورثوفوبيا؟؟

قالي الناس لازم تعرف خطر التوريث



تعرف أن مصر مش فدانين في المنوفيه .. وان احنا مش عبيد أو ملك لحد عشان الأب يورثهم لأبنه


تعرف أن مبارك الابن لو جاء الحكم .. هيجي بانتخابات اقصت كل الرموز التي تعبر عن الشعب .. وما سبتش الا كمبرسات .. وما بني على باطل فهو باطل


تعرف أن نظام مبارك الابن هيكون امتداد لحكم مبارك الاب .. وبالتالي امتداد للظلم والاميه والعنف البوليسي ورمي المواطنين من الشباك والمحاكمت العسكرية و الشباب اللي مش لاقي شغل


تعرف ان مصر هتبقى بلد الكباري والانفاق .. وبرده هيبقى في ازمة مرور


تعرف أن نفس العصابه اللي مسكة البلد دلوقتي .. هتبقى هي هي اللي هتمسك البلد بعد كده .. ومش هي وبس ..دي هي وأولادها


انشروا مرض التوريثوفوبيا ..أفكار أبويا




Tuesday, August 14, 2007

أنا عما .. لأول مرة


في ليلة ليلاء .. زي بتاعت البارحة كده .. رزقت العائلة الشاهينشية والحمد لله بالنسخة الأولى من الجيل الثالث .. بعد خطط تحسين النسل .. وأنا أصبحت عما لأول مرة .. المولود ما شاء الله ..الله اكبر..ولا حول ولا قوة الا بالله .. زي القمر ..وصحته كويسة والحمد لله .. كانو بيفكرو يسموه على اسم مين ؟؟على اسم مين ؟؟ خاصة أنه أول حفيد .. طبعا ملقوش أحسن مني خلقا ورمزا داخل العائلة المبجلة - اللهم ارزقني مزيد من التواضع - فسموه للاسف على أسمي

طبعا أنا في قمة السعاده .. والموقف ده سأظل أسيره فترة طويلة جدا جدا .. مثلا أنا راجعت تفكيري في العشر سنين الجيين .. ده بجد والله مش بهزر .. والناس القريبة مني جدا جدا فهمت أنا عايز أقول ايه

أدعولي بقى عشان الدنيا في الشغل هتطربأ فوق دماغي اليومين الجايين دول .. اللهم يسر لنا جميع أمورنا..على فكرة انا جويا خواطر كتيرة أوي عن موضوع الولاده ده .. بس متلخبطة على الاخر .. هبقى أحاول ارتبها في صورة فوضى منظمة واحكيلكو عليها بعدين


Friday, August 10, 2007

أنت فاهمني؟؟


كان المفترض أن تكون هذه التدوينة تعليقا على تدوينة سابقة كان اسمها - أسئلة معضلة - ذكرت فيها بعض الأسئلة التي قابلتها في بعض الامتحانات وفعلا الأسئلة كانت صياغتها عجيبة وربما البعض من غير المعماريين يجدها دربا من الخزعبلات الخزعبلية وليس لها معنى أصلا . .بس أنا عايز أقولكم أن أنا في أخر سنة ليا في قسم العمارة العظيم جيبت جيد جدا الحمد لله وكان ليا ترتيب كمان على الدفعة ... يعني أنا كنت فاهم الأسئلة دي عايزة أيه وعرفت كمان أجاوب عليها بنجاح .. ومش انا وبس ولكن كمعظم الطلبة المعماريين اللي كانو مذاكرين كويس

يعني أنت عايز تقول ايه يا عم الحج ؟؟
أنا مش عايز أقول اني كنت متفوق.. ولا عايز أقول اني معماري متميز.. ولا عايز أقول ان ابن خالتي اتجوز اول امبارح .. أنا عايز أقول أن لغة الخطاب الخاصة بالمعماريين يفهمها المعماريين كويس أوي لكن لا يفهما الدكاتره أو الصيادلة او التجاريين والعكس صحيح

لغة الخطاب
هي صياغة أو منطوق أومنظور لرسالة موجهة الي الآخر سواء كانت هذه الرسالة رسالة تكتب وتقرأ أو تقال وتسمع أو رسالة فعل ورد فعل

لغة خطاب الحركة الاسلامية ..على أرض الواقع
ربما الحركة الاسلامية طورت من لغة خطابها للمجتمع في الفترة السابقة خاصة بعد ظهور داعية متميز كالاستاذ عمر خالد فبظهوره حدث طفرة كبيرة في الخطاب الدعوي

لكن على ارض الواقع مازلنا أحيانا لا نستطيع التواصل مع شرائح مختلفة بسب لغة خطابنا التي لا يفهما إلا نحن في أغلب الأوقات ..وبنبقى عاملين زي واحد عمال يهاتي ويزعق ومعتقد أن التاني مش سامعة أو مش معبرة .. بس الحقيقة من وجهة نظري أنه مش فاهمه .. زي بالظبط لو أنا بعتلك رسالة زي اللي فوق في الصورة كدة .. هتقول عليا ايه؟؟


فكر معايا .. في هذه المفردات التي نقدمها على ارض الواقع
شكل المسيرات والتظاهرات .. ربما نحن الفصيل الوحيد في العالم الذي ينظم مسيرات في صفوف (تلاتات يا اخونا)ونشبك ايدينا في ايد بعض في منظر فريد شبيه بطوابير التربية العسكرية .. وفكر معايا إذا كان في حد عايز يمشي معاك هيفكر هو إزاي؟

الهتافات .. احنا الاخوان الله اكبر ..اقسمنا يمينا لن نقهر ..وكتاب الله بايدينا .. نقتحم اليابس والاخضر.. زحف الاسلام قادم ..ونعد ندبدب برجلينا على الارض .. وفكر معايا الولد ولا البنت اللي عايزه تمشي معانا هتفكر ازاي؟؟ وليه تجبرني عشان أمشي في مظاهرة تندد بما يحدث في فلسطين والعراق أو مسيرة في سبيل قضية طلابية أني أقول هذه الشعارات .. وبعدين نقتحم أي يابس وأي أخضر ؟؟ لماذا نستخدم لغة خطابنا الخاصة التي احيانا لا يفهما الا نحن في مخاطبة الغير؟؟

وفي إطار الفعل ورد الفعل يوجد امثله صارخة منها القديم ومنها الحديث فعلا اذا راجعنها لن يفهما الا نحن- كحادثة الأزهر- اما باقي المجتمع فمن المستحيلات ان يتفهمها

ربما من الموضوعات التي قدمنا فيها لغة خطاب متزنة ووصلت بقوة ووضوح الي مجتمع الطلبة - مشروع يللا نحب بجد - على الرغم من بعض تحفظاتي عليه ..إلاأنه مثال رائع يحتذى به في لغة خطابه ومفرداته ووسائله

في الاخر انا عايز أقول .. لكل طائفة وشريحة من المجتمع لغة خطاب خاصة لا يفهمها الا اهلها ..فهل يجدي أن أخاطب غيري بلغتي ومفرداتي الخاصة بي ثم أطلب منهم أن يفهموني ويبرروا أفعالي؟؟



تابعوا أحمد الجعلي في ومضاته مع إتقان حياة الحوار

Wednesday, August 8, 2007

شرطة العمرانية تقتل مواطنًا بإلقائه من الطابق الثالث


معلش يا جماعة أنا كنت هانزل تدوينة كاتبها بقالي شهر تقريبا ..وكل شويه اجلها المره دي اجلتها لما قريت الخبر ده .. معلش أنا هنزل التدوينه كمان 24 ساعة


شرطة العمرانية تقتل مواطنًا بإلقائه من الطابق الثالث


قامت مجموعة من ضباط وأمناء قسم شرطة العمرانية بمحافظة الجيزة بإلقاء المواطن ناصر صديق جاد الله- 39 سنة- من الدور الثالث بمنزله في منطقة الزهراء بالعمرانية فلقي حتفه على الفور.
وقع الحادث فجر اليوم الثلاثاء باقتحام قوة مكونة من 15 أمينَ شرطةٍ يقودهم ضابط يدعي أحمد النواوي لمنزل القتيل الذي يعمل سباكًا ولدية ثلاثة أولاد.

وترجع أسباب الحادث إلى قيام المواطن ناصر جاد الله بتحرير محضر ضد أمين شرطة بقسم العمرانية يدعى (أمير) بسبب فرضه إتاوات نقدية وعينية على شباب المنطقة مما أدى إلى احتجاز أمين الشرطة 4 أيام على ذمة التحقيق؛ فقام زملاؤه بالقسم فجر اليوم بتشكيل قوة من 15 أمين شرطة وضابطين، واستقلوا سيارتي ميكروباص؛ وذهبوا لمنزل ناصر في شارع مجلع روماني بمنطقة الزهراء بالعمرانية فوجوده مغلقًا فقاموا بدخول منزل جاره ويدعى بدوي وقاموا بسحله إلى أن دخلوا على شقة أشقاء القتيل من باب خلفي وهما إسحاق صديق وجاد صديق.


ثم فتحوا شقة القتيل بعدة السباكة الخاصة به وقاموا بتكسير محتويات الشقة وقالوا له (إنت بتعمل محاضر في الشرطة.. إحنا هانعلمك إزاي تعمل محاضر)!!! وقاموا بإلقائه من الدور الثالث أمام أعين الجيران فلقي حتفه على الفور وهرب أفراد الشرطة مسرعين واستقلوا إحدى سيارتي الميكروباص اللتين جاءوا بهما وتركوا الأخرى فقام الأهالي بتكسيرها؛ وتوالي حاليًا النيابة التحقيق حيث انتقلت لمكان الحادث

المصدر : موقع نافذة مصر