Friday, August 24, 2007

التوريثوفوبيا .. أفكار أبويا


صحيت من النوم الصبح في احد الأيام ولقيت أبويا الحج كالعادة بيتصفح الجرائد ومنها الدستور اليومي والأهرام ..وبعدين لقيته بيبصلي ويقولي .. هو ايه ؟؟!!همه الناس اللي مامتهم مش كويسة اللي ماسكين البلد فاكرين أنهم هيورثوا الواد فدانين في المنوفيه؟؟ هي فوضى؟هم فاكرين الناس هتسكت؟؟


قلتله أيوه ؟؟ الناس للاسف هتسكت؟؟والتوريث هيحصل دون أدنى مشكلة للنظام؟؟الناس خلاص ما بقاش فارق معاها ..بالعكس في ناس مش حاسة انه في مشكلةأصلا ؟؟وناس مبسوطين وبيقولو احنا عايشين كويس ومبارك ده ميه ميه .. عملينا كباري وطرق ومترو الانفاق والدي اس ال وخلى الترلي يعدي من البيت .. ربنا يكرمة


قالي مهو المصيبة الناس دي مش فاهمة نظرية التطور الطبيعي للحاجة الساقعة؟؟

قلت : اه الحج واضح ان التلفزيون اثر عليه ؟؟؟المهم قلتله: أيوه يا بابا بتقول عايز حاجة ساقعة؟؟


قالي : أنا مبهزرش .. الدنيا كلها بتطور تتطور طبيعي جدا .. يعني لو أي حد مكان مبارك كان هيعمل اللي هيعمله .. يعني ارجع لأي بلد في مستوانا من الثمانينات هتلقيها دلوقتي ز ينا بالضبط يمكن متقدمة عننا؟؟لأن العالم بيمر بحلقات متشابهه من التطور وبالتالي كلنا بنتطور تتطور طبيعي ..يعني التطور اللي في الاتصالات مثلا حصل في العالم كله مش عمله مبارك؟؟ قلتله عندك حق ..بس يا بابا موضوع التوريث ده أيه الحل فيه ؟


فاصل تدويني


اللي مامتهم مش كويسه .. ده مصطلح اتفقت عليه أنا وبابا منذ سنه تقريبا .. بابا كان ديما أما يجي يتكلم عن النظام كان بيقول النظام ابن..$%^ تيييييييت ( لفظ يعني ان مامتهم مش كويسه) قلتله في مرة مبلاش يا بابا اللفظ ده .. هم ميستهالوش ان احنا ناخد فيهم سيئات كمان ؟؟ قلتله نبقى نقول ان مامتهم مش كويسة .. ومن ساعتها واحنا بنقول كده .. طبعا انا قصدي أن مامتهم معرفتش تربيهم عشان كده هي مش كويسة .. مش عشان حاجة تانيه


عدنا


قلتله ؟أيه الحل في موضوع التوريث ده يا بابا ؟؟

قالي ..الناس لا زم يبقى عندهم توريثو فوبيا ؟؟ قلت ضاحكا .. توريثو فوبيا؟؟أنت مزاجك عالي أوي النهاردة

ّ قالي أه .. الناس أول ما تسمع كلمة توريث كأنها قرصها تعبان أو شافت عفريت

قلتله طب ازاي الناس يجلها تورثوفوبيا؟؟

قالي الناس لازم تعرف خطر التوريث



تعرف أن مصر مش فدانين في المنوفيه .. وان احنا مش عبيد أو ملك لحد عشان الأب يورثهم لأبنه


تعرف أن مبارك الابن لو جاء الحكم .. هيجي بانتخابات اقصت كل الرموز التي تعبر عن الشعب .. وما سبتش الا كمبرسات .. وما بني على باطل فهو باطل


تعرف أن نظام مبارك الابن هيكون امتداد لحكم مبارك الاب .. وبالتالي امتداد للظلم والاميه والعنف البوليسي ورمي المواطنين من الشباك والمحاكمت العسكرية و الشباب اللي مش لاقي شغل


تعرف ان مصر هتبقى بلد الكباري والانفاق .. وبرده هيبقى في ازمة مرور


تعرف أن نفس العصابه اللي مسكة البلد دلوقتي .. هتبقى هي هي اللي هتمسك البلد بعد كده .. ومش هي وبس ..دي هي وأولادها


انشروا مرض التوريثوفوبيا ..أفكار أبويا




26 comments:

Ahmed Ismail said...

اتشرف بكوني اول المعلقيين

في موضع التوريث اخشي ان يحدث عندنا كما حدث في سوريا اضافة الى صدور تعليمات الى اجهزة الامن بشل حركة المرور في العاصمة و هذا السيناريو سبق ان جرب من قبل حوالي مرتان اولي عند زيارة بوتين للهرم و الاخري حين اصاب الرئيس التعب في مجلس الشعب.
هما طبعا سيوقفوا المرور و يجيبوا نواب الوطني من ***** و ****** و يغيروا الدستور ان لزم و يجروا كل التصويتات لجعله الرئيس في خلال دقائق قليلة قبل ان يفكر اى شخص في التحرك

محمود قطب said...

قشطة عليك ياحاج شاهين فعلا الناس دول اللي مامتهم مس كويسة لو سبنالهم البلد وسكتنا على اللي بيعملوه هيخربوها فوق الخراب اللي هيا فيه

بس أنا بصراح ياعمو شاهنشي الكبير مختلف مع شاهنشي المتوسط
(المتوسط ديه علشن بقى فيه شاهنشي صغير ربنا يبارك فيه سليل عائلة الشاهنشين المبجلة)

في موضوع أن الناس مش هتتحرك
لا الناس هتتحرك هتتحرك لأن لقمة العيش اللي كانوا خيفين عليها غالبا خلاص مش هيلقوها والناس قربوا ينفجروا

لكن المشكلة الحقيقية أن الناس تتحرك بس علشان لقمة العيش

لأني على رأي المثل
اللي يتحرك علشان لقمة العيش ممكن يسكت برغيف حواوشي

(متسألنيش جبت المثل ده منين علشان أنا معرفش)

لكن الناس لازم تتحرك عشان مشروع يكونوا مؤمنين بيه ومقتنعين أشد الأقتناع أنه حل لكل مشاكلهم ويكون عندهم أستعاد أنهم يضحوا علشانوه

باأختصار لازم نجمع الناس حوالين مشروعنا الناس كل الناس المسلم والمسيحي الراجل والست الكبير والصغير

alnagar said...

انا معلش مع والدك انهم ولاد ..... مش ست مش كويسةو بس لا وكل حاجة ممكن يقولها ونقولها معاه

Ahmed Ismail said...

بالنسبة للتطور الطبيعي للحاجة السقعة

فأنا اتفق مع أ. عبد السميع لأن التطور شئ طبيعي لكن الغير طبيعي هو معدل التغيير.

و لكن اود أن اوكد انه يوجد قيادات سياسية حديثة على السلطة طموحة لا ترضي بالفساد و تسعي باخلاص لاجل البلد و لكن المشلكة البطانة التي تحتها سواء المديرين او المرؤسيين في عدم جديتهم في تنفيذ الاوامر و نقل الواقع بصورة تخالف الحقيقة.او تزيين و تجميل قضية لصالح اهواء شخصية.

فالاصلاح يجب ان يبدأ من القاع.

ايضا احد ان اضيف ان المجتمع يقع على كاهله عبء كبير عن طريق منظمات المجتمع المدني في خلق راى عام تجاه قضية معينة و تبصير القيادات بما يحدث في الواقع عن طريق ارسال التقاير و الشكاوي للاجهزة المختصة

شقلبان said...

الناس دي مامتهم مش كويسة
وباباهم مش كويس
واهلهم مش كويسين

محمود قطب said...

معلش ياشاهنشي المتوسط سليل عائلة الشاهنشين المبجلة أنا حابب أضيف نقطتين كمان

أولا كما يقول البعض أن هناك أقتصاد إسلامي وفن إسلامي وغيره
يبدو أنك أضفت مصطلحا جديدا دون أن تقصد وهو أسلمة الشتائم
وده ليه فوائد كتيير أهمها أنه يخلينا نعبرعن الضيق اللي جوانا دون الوقوع في حرج شرعي
وكمان أحنا كده نقدر نقدم للمواطن المصري في برنامجنا بديل لحاجة ميقدرش يعيش منغيرها وهي الشتائم الحلال
هاهاهاها

ثانيا بالنسبة لموضوع التطور الطبيعي للحاجة الساقعة فالحاج شاهنشي الأعظم معاه حق
الحكومة بتقدم جزء من الخدمات الأساسية اللي يضمنلهم أن الناس مش هتنفجر

ولكن ده غالبا خلاص بح مفيش حتى الحاجات الأساسية
مشكلة المياه
أرتفاع أسعار السلع الأساسية حتى العيش صغروه وغلوه

sharkawoo said...

الناس إلي مماتهم مش كويس

بس دول كثير يا عم الحاج :D


والله يا سيدي الموضوع محتاج شغل كبير أوي

احد الأشخاص حكي لي لماذا في إيران يخرجون بالآلف في أي مظاهرة وهنا لو عده 500 بنبقي فس سعادة غامرة

قال إن المرشد بتاعهم ( مش بتاعنا )

كان بيصدر ملفات سرية ودورية عن عدم الخوف والتعبير عن رأي

لحد ما أخذ الشعب مكانته

يا تري الحاج ناوي يعمل كدا

انا من موقعي هذا بقول أني أرفض وأشجب وأستنكر :D

The Last Samurai said...

يا عمنا شاهينشي ... أنا رأيي نفكنا من السياسة و السأن العام و بلاش حرقة دم ... سيبها ماشية زي ماهية ماشية ... الله وحده يعلم هي البلد دي لسه قايمة إزاي

البلد دي راكبة القطر السريع مش عارف لسه مجري و لا أسباني نحو .... مصيبة كبرى إنشاء الله

أما اللي مامتهم مش كويسة ... فكله سلف و دين ... أدي دأني إن لم يتذلوا زي ما ذلوا الناس تمام بتمام


نصيحة ركز مع ربنا و في شغلك و سيبك من الهبل اللي بيحصل ده
و دي نصيحة ليا قبل ما تكون ليك

أحمد سنوسى- تعالوا نحلم said...

شاهنشى

معلش الفترة اللى فاتت ما كنتش بدخل ع النت ما مكنتش متابع تدويناتك
سامحنى

اولا : الف الف مبروك على ابن اخوك و بقيت عم يلا يا سيدى

ثانيا : والدك دا راجل تمام

و حلو اوى - التوريثوفوبيا - ده

و الناس دى مش مامتهم بس اللى مش كويسة دى كل عيلتهم مش كويسة

و يبقى انت اكيد فى مصر

خلاص الواحد اتخنق

واصطنعتك لنفسي said...

عجبني مقالك جدا..بس تفتكرأيه الحل؟؟ أنا عارفة أنها فضفضة.. مهو لو ما فضفضناش ننفجر..تفتكر أننا نكون جزء من كفاية هو الصح؟؟ ..و لا هنفضل زي ما أحنا لغاية لما نلاقي ..فوالا.. سي جيمي خدها كلها؟؟ أنا فعلا مش عارفة أيه الحل
بس أنا متفائلة.. ليه؟؟ لأن الناس فعلا قرفت.. الفقرا بقوا فقرا أوي.. و الغلابة بيزيدوا غلب و أحنا بننسي كثيير للأسف

علي أية حال في حديث فيما معناه: تفائلوا بالخير تجدوه

و ربنا قادر علي كل شيء
المشكلة أنه لما يورث هيورث الارض بالفلاحين والاجراء..و الناس مدركة بس للاسف في منهم بيقول أهو حرامي نعرفه أحسن من حرامي جديد لسه هيسرق من أول و جديد.. بس يا تري في حرامي بيشبع؟؟؟؟

يا طير يا عالي في السما طظ فيك
ما تفتكرشي ربنا مصطفيك
برضك بتاكل دود و للطين تعود
تمص فيه يا حلو.. و يمص فيك
و عجبي


يا ريت بس نفضل فاكريين أن مصر مش الريس..مصر جميلة و العيب مش فيها..العيب في كل اللي مامتهم مش كويسة

معلش أصلي بحب بلدي أوي

FAWZYYYY said...

أنا أول مرة آحد شرف التعليق رقم 11
بص يا ابن الراجل الطيب
أولا انت ليه مبتردش عالتعليقات
هى الناس دى مش المفروض يترد عليها برده
ثانيا:ملكش دعوة بالسياسة مطلقا نهائيا عشان دى محجوزة للمنايفة
ثالثا:طول ما الراجل اللى ماسك اللد طويل (نسبيا) فاحنا وراه و لكن أول ما يقصر صدقني العيلة بتاعتنا كلها هتحدفه بالطوب
رابعا:انا حاسس ان الموضوع ده ميتردش عليه في تعليق ده محتاج منتدى سياسي أو برنامج أو ما شابه
انما سريعا كده
(أنا عندي احساس انا الواد هيموت قبل أبوه اللى مش راضي يموت ده
ختاما :سيبك من كل اللى انا كاتبه أنا كن بس عايز أسلم عليك و ان شاء الله التعليق بعدين

SHAHEENSHY...فوضى منظمة said...

الضيوف الكرام أنا آسف أني مبردش على التعليقات .. النت فصل في البيت ومبعرفش أخش على النت كتير في الشغل .. إن شاء الله هرد على كل التعليقات النهرده بالليل.. وأنا آسف ياجماعة مرة تانيه وجزاكم الله خير

inksarat said...

البوست ده عجبنى فوق ما تتخيل بجد

لكن المشكلة انى خايف احسن التوريثوفوبيا تأثر على الناس ومتخليش حد يورث حد وكل ما حد يموت فلوسه تروح للحكومة وهى اللى تتصرف

يارب استرها

SHAHEENSHY...فوضى منظمة said...

أحمد اسماعيل .. ازيك يا باشا ..ربنا يستر يا احمد في موضوع التوريث ده .. والموضوع مش انهم يوقفو البلد وبس .. الموضوع اكبر من كده بكتيييييير ..بالتوفيق

SHAHEENSHY...فوضى منظمة said...

قشطة عليك انت يا حج قطب..ولو انها جت متأخرة .. أنا معالك طبعا .. فعلا أهم حاجة دلوقتي ..أن الناس تتجمع على قاعدة مشتركة ومشروع واح .. إلا صحيح .. أنت بتجيب الأمثلة دي منين؟؟؟؟

SHAHEENSHY...فوضى منظمة said...

النجار .. شرفتني زيارتك .. وطالما انت مع الحج الكبير مش هقدر أقولك حاجة

SHAHEENSHY...فوضى منظمة said...

أحمد اسماعيل تاني .. أزيك .. التطور الطبيعي للحاجة الساقعة .ز نظرية منطقية جدا.. أما بالنسبة لقيا
ات سياسية نظيفة فأنا عندي شك كبيييير .. بالتوفيق

SHAHEENSHY...فوضى منظمة said...

شقلبان .. الاسم بيفكرني دايما .. باذاعة شقلبان محطة اذاعة حلاوة زمان للنحلم أحمد فؤاد نجم .. ربنا يسامحهم ويهديهم الناس اللي مامتهم مش كويسة .. بالتوفيق

SHAHEENSHY...فوضى منظمة said...

قطب تاني .. أنا متفق معاك ياحبي .. بس بيني وبينك موضوع اسلمة الشتائم .ز أحنا أصلا كمحترمين المفروض منشتمش .. بس ساعات كبشر بنخرج عن شعورنا .. جزاكم الله خير .. وانت على فكرة واحشني أوي

SHAHEENSHY...فوضى منظمة said...

شرقاوووووووووه .. أخويا الطويل .. واحشني أوي .. هم فعلا الناس دي كتير أوي .. وبعدين أه ياعم الكلام اللي انت بتقوله.؟؟عايز تخلي أبويا مرشد؟؟ده غلبان يا عم .. ادعيله ربنا يديله الصحة

SHAHEENSHY...فوضى منظمة said...

الساموراي الاخير .. جزاك الله خير على النصيحة .. بس الواحد في الاخر لازم يهتم بكل اللي بيحصل حوليه .. ومن لم يهتم بامر المسلمين فليس منهم .. بس بصراحة فعلا ساعات ببقى عايز أكبر دماغي .. بس مبقدرش .. في حاجات بتخلي الواحد يغلي .. بالتوفيق

SHAHEENSHY...فوضى منظمة said...

سنوسي .. عود أحمد للتدوين .. وربنا يبارك فيك ..وجزاكم الله خير

SHAHEENSHY...فوضى منظمة said...

واصطنعتك لنفسي .. شرفتني زيارتك ..حلو أوي البتين اللي انت كتبتيهم .. وان شاء الله الخير موجود وهيعم الناس كلها اريب .. جزاكم الله خير على تعليقك .. بالتوفيق

SHAHEENSHY...فوضى منظمة said...

فاوزي .. أنت عمال تاخد شرف كل الارقام .. على العموم رقم حداشر هو عبارة عن واحدين ورا بعض ...وانا قى بصوت عالي بقول .. أنا مش مع المنايفة وضد الطوال..أما بالنسبة للواد وابوه فعلى رأي سواق تاكس كنت راكب معاه ..ربنا ياخدهم هما الاتنين ..بالتوفيق

SHAHEENSHY...فوضى منظمة said...

أنكسارات .. شرفتني زيارتك .. ومدونتك رقيقة أوي وجميله..والله لو الوضع بقى على ما هو عليه ..فعلا محدش هيورث حد .. عشان مفيش حد هيبقى معاه فلوس أو ملك أصلا .. الحكومة هتخلص على كل حاجة .. بالتوفيق

تجمع المدونين الطامحين في وطن عربي بدون سجين رأي واحد said...

يلا نفضحهم
مدونه تمثل بدايه عمل جرىء و قوى
عن طريق لجنه بدأها و يرئسها الأستاذ / "محمد عبد القدوس" بالقاهره
والدكتور / " إبراهيم الزعفرانى" بالاسكندريه
هدفها فضح جرائم هذا النظام
من تعذيب و هتك أعراض و تزوير و و و و و
شارك معنا بمدونتك
عن طريق وضع رابط لنا على الاقل
لوضع الرابط برجاء الدخول على المدونه و نقل الكود الموجود بداخلها
Yallanefdahom.blogspot.com
نحن نسعى لتجميع اكبر عدد للمدونين لعمل شبكه ضخمه من المدونين تجعل كل من تسول له نفسه أن يعذب او يزور او يرتشى أو أو أو
أن يفكر الف مره قبل الأقدام على ذلك
نرحب بأى مشاركه على بريد المدونه
efdah@yahoo.com
إفضحوهم